غدر الخناجر
عفى الله عن خطا غدر الخناجر و الضلوع الطال
بسامح وأتركك تحت الظلام الحالك الحالك
دخيلك وفر دموعك ترى هدر الدموع ذلال
وترى ما فيه أحد يصبر مثل صبري بغربالك
انا عيب علي أنقض كلامي والرجال أفعال
واذا قلت أقطع حبالك تراني باقطع حبالك
عشان اكسب هدب عينك تجرعت العذاب أشكال
وليتك ترأف بحالي عشان ارأف بحالك
مسوي في حياتي شئ ما يذكر ولا ينقال
حشى حتى العدو وهو العدو ما يعمل اعمالك
تمسيني على الهم وتصبحني على الغربال
تقلطني فناجيلك وتقصر عني دلالك
تحملت التعب لجلك وأنا حملي يهد جبال
رحلت من العذاب وما وقفت الا على جالك
علامك كلما اجيك متواضع جيتني تختال
معاك اليا متى بصبر وصبري معك يحلا لك
مثل ماقبلت لعيونك لزوم تلدلي باقبال
ومثل ما قد حشمتك حس واحشم قلبي أشوى لك
أنا محد مجابرني أساير معك المنوال
ترى لا ني تبيع لك ولا ني أصغر عيالك
أنا جيت أعشقك نبض ومشاعر ما اعشقك تمثال
أنا جيت اسكنك واحياك وأبقى فيك وأبقاك
أنا جيت بظمأ عاشق تعب يطرد سراب الال
جيت استفز رضاك من فرقاك وألجا لك
أنا ماهمت بك عاقل أنا كنت أعشقك بخبال
أنا ما كنت أحبك حي أنا كنت أعشقك هالك
تخيل من كثر ما اخاف تلقى للزعل مدخال
أخاف أخطي على طيفك وادوس برجلي أظلالك
تبعتك والعرب تتبع رعود البارق الهمال
وانا شفت المطر يتبعك في حلك وترحالك
كان اللي خلق حسنك خلقني مع جسدك أظلال
وصرت اقرب جسد يمشي معك بقفاك و قبالك
أبي قلبك يحس انه فقد بمحبته رجال
ملكته من هدب عين وخسرت ارضاه بهمالك
صحيح ان الفراق اقسى ولكن الوصال محال
وانا صعب علي ارضي غرورك واضعف قبالك
بعد ما عودت عيني في بعك للرقاد آمال
اعود للسهر يا خوي فال الله ولا فالك
ببدل نظرتك فيني واجيلك كل يوم بحال
باكون اقرب من ثيابك عليك ولا تهيأ لك
بالمك وانثرك واجمعك وارجع وانثرك بهمال
باخونك وازعلك وارضيك وازعل منك وارضالك
ابرسم بالثرى وجهك وبادفن صورتك برمال
ابشكي للعرب فرقاك واضحك عند عذالك
ابهديك الوصال فراق والفراق وصال
باسوي مثل ما اشوفك تسوي وافعل افعالك
عشان تعرف مين فينا الزعول ومين وسيع البال
ابيك اتذوق فنجالي وانا باذوق فنجالك
نصيحه واحتفظ فيها قصر معك الزمن او طال
ابي تسمع كلامي زين وتحطه على بالك
اذا حبك اهبال اطفال الك عندي هبال اطفال
ولا وابشر بعد بهبال حب مهو بهبالك
واذا قصدك تهين اسمي عشان تشمت العذال
حشى لا انت ولا غيرك ولا عشرة من اشكالك
الإثنين 15 سبتمبر - 21:15